موقع جامع لكل الطلاب السودانيين في السودان والوطن العربي


    ---- اول سنه في الجامعة ---- ((اخطاء وتجارب ادخل واتعلم ))

    شاطر
    avatar
    habibo
    مجلس الادارة
    مجلس الادارة

    عدد الرسائل : 85
    العمر : 27
    الموقع : السودان
    العمل/الترفيه : طالب
    المزاج : رااااااااااااااااااااااااااااااااايق
    نقاط القوة :
    100 / 100100 / 100

    الاوسمة : 0
    تاريخ التسجيل : 08/07/2008

    ---- اول سنه في الجامعة ---- ((اخطاء وتجارب ادخل واتعلم ))

    مُساهمة من طرف habibo في الخميس يوليو 10, 2008 11:46 pm

    طبعا الايام دي ايام الناس في انتظار الجامعات والحاجات دي لكن انا هنا بتكلم عن الناس الي اول مره حتخش الجامعة بمعنى اوضح البرالمة ......

    اول شي البرلوم بكون متشوق عشان يدخل الجامعة ... بسبب الحرمان الي بعيشو قبل الجامعة وده السبب الاكبر لي انفلات اكتر الناس في اول سنه ليهم ...

    (((((الكلام الي حاقولو هنا ما بينطبق على عامة الناس .. عشان الناس ما تزعل )))))



    التصرفات ... :


    طبعا الزول اول ما يدخل الجامعة بتعرفو كيف انو برلوم .... بتلاحظ الحاجة دي في اللبس .. لبس جديد بكون لبسو يعني حاجة كده صبيانية زي ما بقولو بتكون الوانو غريبة ...والريحة الما عارف كيف.. والجل .. وعلبة السجاير تلقاهو بشرب فيها اليوم كلو يعني اول ما يدخل الجامعة سجارة . وصل الكافتيريا سجارة .. قبل المحاضر .. بعد المحاضرة ..... وكده لي نهاية اليوم ... ..

    نجي لي تصرفاتو مع البنات ... طبعا بكون اول مره يحتك بي الجنس الاخر (( ما كل الناس ... )) بي الطريقة دي بكون عاوز يتعرف على كل الجامعة في يوم واحد بي معنى واضح ... شلييق .. يجي ناطي لي دي ويتكلم ليهو كلمتين ويطلب رقم تلفونها .. والغريبة انو البت (( البرلومة )) طواااالي بتديهو الرقم طوالي لييه .. لانو قايلاهو شالو منها هي بس ما شالو من عشرين قبلها ..... يعني اول ايامو بكون عايش ملك ودي تتصل عليهو ودي تمسج ليهو ... لكن اديهو شهر بس بينكشف والناس بتكش منو .....

    نجي لي البرامج .... : بكون البرلوم دايما عاوز يطلع وعاوز يبرمج .. يعني الليلة المول .. بكره نمشي ناكل في لذيذ بعدو ماشين البيتش ... وكده .. بوريكم حيحصل ليهو شنو بعدين ..

    ناحية القروبات .......:

    البرلوم بدون ما يحس بيلقى نفسو في وسط شلة من الشباب وبكون شايفهم انهم عندو احسن من الناس دي كلها لي درجة انو ما يعبر زوول لكن اقول ليكم حاجة وصدقوني حتلقوها صاح وانا قالوها لي وما صدقت الا لما عديت كم شهر ((( القروب الي بكون معاك اول الجامعة استحالة يستمر معاك لي قدام )))

    الناحية الدراسية ......:
    لو جينا لي الناحية الدراسية مافي ليها اهتمام من اغلب البرالمة يعني بي سبب فرحتو بي الجامعة بضيع قرايتو .. لييه بي سبب البرامج الكتيرة والجري ورا الخلط والحاجات دي ويجي يقول ليك انو الجامعة صعبة ويشتم الجامعة والحاجات دي ... مع انو الجامعة والللللله بتديك على قدر ما بتديها ...


    نظرة السناير للبرالمة ..... :

    البرلوم بكون بكره السناير اول السنه لييي ؟ لانو بكون لامي البرلومات اول السنه وشوية يلقى السنير خطفهم منو ...


    برضو السنير بشوف البرلوم انو هدف ساهل لي ما يسمى بي البرلمة ... يعني انت زوول دايش وما عارف مكان اي شي ... وتكون عاوز قاعة قريبة ممكن تسال السنير ويمروحك يعني يوديك قاعة يمكن تكون برا الجامعة ((( حسب شفتنتو وحسب دلاختك ))) ...
    وبرضضو هناك ما يسمى بي البرلمة الجماعية يعني سنير ممكن يدخل على قاعة كاملة ويفهمها انو استتاذ او محاضر ويمسك بيهم خط مدة ساعتين ...


    ودي يا جماعة حاجة بسيطة من اجواء الجامعة وممكن نلخص ليكم الكلام ده في نصائح بسيطة ممكن تنفعك في جامعتك ....

    1:اختار اصحابك بي عناية ودراسة ليهم لانو هم اساس الجامعة وطباعهم بتكون فيك ...
    2 :اول اسبوعين في الجامعة عيش حياتك اطلع وفرفش وسوي العاوزو لكن بعد داك حاول قلل حبة حبة لما تلقى روحك شديت في قرايتك .
    3 : صدقني القعاد في الجامعة لحدي 5 عصر و 6 عصر ما حيفيدك وحتندم عليهو .. يعني حاول ارجع بيتكم بدري حتى لو ما قريت المهم ارجع ..
    4 : احترم اصحابك وصاحباتك في الجامعة واوعك تعمل في فترة من الفترات انك تقيل وما فضي تقعد معاهم وحاجات زي دي والله حتلقى الناس نستك وما فارقة معاهم قعدتك معاهم ..
    5 : خلي وشك مبتسم لي تالناس لما تقابلهم واسال منهم حتى لو ما جروبك .. صدقني حتخلق من نفسك شخصية محبوبة في الجامعة ...
    6:اهم شي ما تخت في بالك انو انت عاوز تحب ويكون عندك جكسوية في الجامعة لانو حتلقى روحك حبيت براااااااك بدون ما تعرف ..
    7 : ما تحكم على الناس بي الاشكال واللبس والحاجات دي ... لانو في ناس ما بتعرفهم الا في المواقف الصعبة ..
    8 :حاول اعتمد على نفسك في الفهم عشان ما تضر انك تلاحق الفاهمين قبل الاختبارات ..
    9: اوعك تدمن على البلياردو والويست والحريق لانك لو اتعودت عليهو فردة الكتشينة حتكون في جيبك زي الرخصة ..
    10 : اوعك محاضر يعرفك او تحاول تتعرف عليهو وتعمل اخلاق لانو بطير ليك بعدين اقل غلطة منك بكون حافظ شكلك خليك معروف بي اسمك بس بدون شكلك ...

    ّّّّّّّّ@@$%%^&*)(_(*^%$^)((_)&^&(_()&^*×_

    مصطلحات يمكن تمر عليك في الجامعة وتحتاج تعرفها .....
    1 : ليكشر .......... محاضرة
    2 : اتيندس ..........حضور
    3 : تندس لي .......... سجل لي حضور
    4 :شيت ............ ما يعرف في الخليج بي الملخصات
    5 :لاب زيرو ........... دورات المياه
    6 :سميستر ........... فصل دراسي
    7 :نوبيرا .......... انذار (( اشتهر في جامعة السودان ))
    8 :ديتوريال ......... متابعة (( محاضرة لمتابعة مستوى الطلاب في مادة واكتر شي الرياضيات ))


    $%&*&^%$%&*)()&%$^)*()&^%&)(*^%%*()


    ويا شباب اكتر الكلام ده من تجربة شخصية لي وانا بقول ليكم حاجة واحدة بس يمكن تنفعكم
    الجامعة بتديك على قدر ما بتديها








    ارجو اني اكون وريتكم حاجة من جو الجامعة لي الشباب الداخلين جدد في العالم ده وكلامي ده ما بينطبق على كل البرالمة ولكن على الاغلبية منهم .....


    اي استفسارات وتعليقات انا متوفر ...






    ahmed
    مشرف المنتدى العام

    عدد الرسائل : 14
    نقاط القوة :
    0 / 1000 / 100

    الاوسمة : 0
    تاريخ التسجيل : 11/07/2008

    رد: ---- اول سنه في الجامعة ---- ((اخطاء وتجارب ادخل واتعلم ))

    مُساهمة من طرف ahmed في الجمعة يوليو 11, 2008 3:04 pm

    شكرا هلا هذه النصائح والمعلومات
    التى سيستفيد منها الطلاب الجدد والقدامى ايضا
    تسلم
    avatar
    TACAT
    مجلس الادارة
    مجلس الادارة

    عدد الرسائل : 40
    العمر : 29
    نقاط القوة :
    100 / 100100 / 100

    الاوسمة : 0
    تاريخ التسجيل : 08/07/2008

    رد: ---- اول سنه في الجامعة ---- ((اخطاء وتجارب ادخل واتعلم ))

    مُساهمة من طرف TACAT في الإثنين يوليو 14, 2008 9:13 pm

    مشكور علي التوضيح وانشاء الله اخوانا البرالمة يستفيدو منو وما يقعو في الغلط واسمع كلام الببكيك وما تسمع كلام البضحكك
    avatar
    habibo
    مجلس الادارة
    مجلس الادارة

    عدد الرسائل : 85
    العمر : 27
    الموقع : السودان
    العمل/الترفيه : طالب
    المزاج : رااااااااااااااااااااااااااااااااايق
    نقاط القوة :
    100 / 100100 / 100

    الاوسمة : 0
    تاريخ التسجيل : 08/07/2008

    رد: ---- اول سنه في الجامعة ---- ((اخطاء وتجارب ادخل واتعلم ))

    مُساهمة من طرف habibo في الجمعة أكتوبر 10, 2008 7:57 pm

    شكرا علىى كلامك الرائع اخوي طاهر وانشاء الله تكون دى نصائع كويسة للبرالمة

      الوقت/التاريخ الآن هو الثلاثاء أكتوبر 24, 2017 7:41 am